"Spocznij se kapke"
Kie słóneczko fest przigrzywo,
To sie robić łodechciywo,
Człowiek jyny fuczy, sapie,
A z głowy mu fórt pot kapie,
I cóż w tyn czos na to poczónć?
Możne trzeja se łodpoczónć?
Siednóć kajsi w ciyń pod śliwkóm,
I łodewrzić zimne piwko,
W trowie nogi se wyprościć,
Porozcióngać wszystki kości,
Piwko pómału popijać,
I sie na przirode dziwić,
Tu ślimoczek, a tu mrówka,
Tam na listku bożo krówka,
Ptoszki nad głowóm lotajóm,
Gorzyj jak mje popyrskajóm,
Tam kocur leci za koczkóm,
A żaba puszczo mi łoczko,
Wiesioło na polu spoczywać
Bo dycki je na co sie dziwać,
I bónczki popuszczać se mogym,
Żodnymu tym krziwdy nie zrobiym,
Na miedzy se strzelym drzymule,
Nie bydym sie starać wogóle,
Dyć człowiek nie wół i by przeżył,
Toć dychnónć mu sie noleży!
autor Anet
